ПОЈАДОК: Калцоне

Состојки

– 1 интегрална тортиља
– 5-6 свежи шампињони
– доматно пире
– неколку маслинки
– 30 гр моцарела
– зачини: оригано и сусам по желба
– рукола
– домат опционално

Начин на припрема

Шампињоните исечкај ги на најтенко што можеш за побрзо да се испечат заедно со тортиљата, нејзе не и треба многу. Намачкај ја тортиљата со доматно пире, стави ја моцарелата па шампињоните и маслинките, и нароси со оригано и сусам, ќе имаш впечаток дека јадеш пица навистина. Кога ќе почнат да менуваат боја шампињоните, тортиљата е при крај. Извади ја од рерна, преклопи ја на пола и на здравје појадок. По желба можеш да ја јадеш со рукола и домат.

УЖИНА: Лубеница киви смути

Состојки

– 300 гр. лубеница
– 2 киви
– ДОИЛКИ: 2 лажици чиа
– мраз
– вода за регулирање густина( нема потреба, но, долколку сакате ептен течно додај слободно)

Начин на припрема

Уште една ужинка која функционира на принципот, грабнеш и бегаш! Сите состојки ги ставаш во блендер и имаш освежителна ужинка каде и да си!

РУЧЕК: Брза ручек супа

Состојки

– 1 готова супа од петел за замена готова зеленчукова супа
– 2 моркови
– 1 цвет брокула тој се додава на крај
– 1 цвет карфиол
– 1 кромид исечкан на тенки листови
– 1 јајце
– 1 лажиче алкохолен оцет
– магдонос
– 1 интегрално лепче

Начин на припрема

Најпрво го полниме тенџерето со 700мл вода. Се сечка зеленчукот и се додава во водата, веќе при крај кога зеленчукот е сварен се додава и готовата супа од петел/зеленчукова супа. Кога супата е готова, настрана во шолја за кафе убаво се меша јајцето заедно со алкохолниот оцет па се истура во супата. Тоа е така за да се направат што помалку парчиња кога ќе се додаде јајцето.

ВЕЧЕРА: Карпачо од тиквички

Состојки

– 1 или 2 тиквички зависи колку си гладна
– 2 карамелизирани оревчиња или 1 мала лажичка кикиритки
– 30 гр фета сирење на коцки
– За дресинг:
– 1 лажичка мала мед 1 голема лажица лимон, 1 лаж балсамико, 1 мала лаж маслиново, малку сол, рузмарин по желба.

Начин на припрема

Тиквичката свежа ја сечеш на тенки лентички или најдобро на ренде за крупни тенки кругчиња. Потоа, тиквичките се пропржуваат на малку маслиново масло или се потпекуваат. После ова ги редиш на чинија, одозгора коцкичките фета и го истураш дресингот врз нив. Затоа што често ќе го имаме карамелизираниот орев во рецепти, можеш да си го направиш сама. Во плех за печење на мрсна хартија стави ги оревите, а одозгора истури им 2 големи лажици кафеав шеќер, а потоа складирај ги во тегла. Не е погрешно ако ја направиш салатата и со обични ореви, но за жал нема да го почувствуваш вистинскиот вкус.

ПОЈАДОК: Пршута тост

Состојки

– 2 интегрални лепчиња или 1 поголемо, зависи каков леб користиш
– 40-50 гр говедска пршута
– 1 лажица грчки јогурт
– ¼ авокадо
– Свежа зелена салата по избор (бејби спанаќ,рукола,марула)
– Зачини: шарена сол, буковец, црн бибер
– Малку сок од лимон
– Прстофат сол

Начин на припрема

Уште еден брз и едноставен појадок без многу магии во кујната. Потпечи го лепчето, премачкај го со грчки јогурт па испасирано авокадо, капни малку сок од лимон врз испасираното авокадо и нароси со зачини па како јаготка на шлагот стави ја пршутата. Наздравје!

УЖИНА: Цреши

Полна шака цреши ДОИЛКИ + 25-30 гр несолени јатки по избор

РУЧЕК: Модар патлиџан со мелено месо

Состојки

– 1 модар патлиџан
– 150 гр мешано мелено месо
– ½ кромид или 1 цел
– 1 домат
– ½ црвен кромид
– ½ краставица по желба
– 1 зелена пиперка
– Младо кромитче опционално
– Магдонос
– 1 лажица грчки јогурт
– 1 лажиче сенф
– Зачини: тако зачин, црн бибер, буковец, сол (за месото), оригано за салатата
– Малку лимонов сок

Начин на припрема

Патлиџанот пресечи го на кругови, прсни малку сол и стави да се пече на хартија во рерна. Во меѓувреме, на тавче пропржи го кромидот со меленото месо, а додека патлиџанот се пече а месото се крчка, исецкај ги зеленчуците за салатата ситно, стави ги во еден длабок сад и нароси зачини, лимонов сок и маслиново масло. Извади ги патлиџаните и нареди си ги во една чинија како основа, премачкај ги со грчки јогурт и сенф (измешани заедно), истури го месото па одозгора салатката.

ВЕГЕ РУЧЕК: Веге лазања

Состојки

– 1 модар патлиџан
– 50 гр леќа (сирова) или 150-200 од тегла/конзерва
– ½ кромид или 1 цел
– 1 домат
– ½ црвен кромид
– 1 зелена пиперка
– Младо кромитче опционално
– Магдонос
– 1 лажица грчки јогурт
– 1 лажиче сенф
– 100 мл доматен сос
– Зачини: тако зачин, црн бибер, буковец, сол

Инструкции

Најпрво, леќата стави ја да се вари. Во меѓувреме исецкај си го зеленчукот, и тоа патлиџанот на ленти а другите зеленчуци на ситно и стави ги во тавче на малку маслиново масло да омекнат. Исцеди ја леќата и додај ја кај зеленчуците да се пропржи малку, зачини па доматен сос. Во мало тавче за печење реди ленти модар па од смесата зеленчуци, на крај прелиј со грчки и сенф, и стави да се пече на 220 степени од прилика пола саат. Комбинирај со свежа салата.

ВЕЧЕРА: Компир салата

Состојки

– 250 гр компир варен или печен
– 1 краставица
– 1 лажица грчки јогурт
– копар сол, бибер, масло

Начин на припрема

Компирите се варат или печат, мене ми е повкусно кога се печени, внимавај на точна грамажа, ако ги вариш се мијат со ладна вода и се истураат во сад за салата, се додава грчкиот јогурт, краставицата, копар и се меша. На здравје!

///

ПОЈАДОК: Фета Фритерс

Состојки

– 1 тиквичка
– 2 јајца
– 2-3 лажици овесно брашно (овесни снегулки смелени)
– 2 лажици грашок од конзерва (или смрзнат свари го во ѓезве)
– Младо кромитче опционално
– 30 гр фета сирење
– Прстофат сол
– Малку пециво
– Зачини по наша препорака: шарена сол, малку црн бибер и буковец по желба

Начин на припрема

Една мала тиквичка изрендај ја и исцеди ја од вишокот течност, додај кај неа младо кромитче сецкано на ситно, јајцата, грашокот, фета сирењето изгмечено и зачините. Промешај ја убаво смесата и истурај од смесата со лажица директно на хартија за печење која е секогаш мој прв избор, или ако ептен се брзаш пржи ги на нелепливо тавче на една мала лажичка маслиново масло. Комбинирај си со свежа салата по твој избор.

УЖИНА: Полнети урми

2 урми наполнети со едно мало не многу полно лажиче путер од кикирики

РУЧЕК: Традиционален ориз и копан

Состојки

– 3 лажици ориз (жив)
– 1 копан со поткопан
– 1 кромид
– 1 морков
– Лукче опционално
– 150 мл доматен сос
– 1 лажица соја сос
– 1 мало лажиче сенф
– 1 лажица грчки јогурт
– 1 коцка супа
– Малку сок од лимон
– Зачини: шарена сол, црн бибер, буковец

Начин на припрема

Сабота е ден за пиле! Слободно дуплирај доколку спремаш за сите дома. Во едно тавче пропржи ги кромидот и морковот, па додај го оризот (може и жив а може и претходно сварен), па додај го доматниот сос, соја сос, сенф и грчки јогурт па и зачини. Доколку сакаш може да додадеш и вода, а штом зоврие додај ја и коцката супа. Чим се раствори коцката,префрли го оризот во тавче за печење а врз него постави ги копанот и поткопанот, и капни им сок од лимон. Процени самата дали има доволно течност за да се пече, во зависност дали сакаш потечно или посуво. Комбинирај го овој ручек со зелена салата по избор.

ВЕГЕ РУЧЕК: ПЛЕСКАВИЦИ СО ОРИЗ

Состојки

– 3 лажици ориз (жив)
– 150 гр црвен грав од конзерва
– ½ кромид
– 2 лажици овесни снегулки
– Лукче опционално
– 1 лажица соја сос
– Зачини: шарена сол, црн бибер, буковец
– Малку доматен сос опционално (за на крај)

Начин на прпрема

Оризот стави да се вари, а во меѓувреме да ги направиме плескавиците. Во едно длабоко садче стави го црвениот грав и убаво испасирај го, кромидот исецкај го и додај го кај гравот заедно со зачините,соја сосот и овесот. Состојките може и да ги изблендираш, како ти е полесно така. Во зависност од тоа каква ќе биде смесата, може да додадеш 1 јајце ако е многу густа или малку кисела вода. Може да ги печеш или пржиш плескавиците, а потоа сервирај си ги заедно со оризот. Комбинирај со домат, или ако баш ти оди, може да си ставиш малку доматен сос одозгора.

ВЕЧЕРА: Највкусната зелка салата

Состојки

– 1 мала зелка или ½ ако е поголема
– Младо кромитче
– Чешне лук
– Магдонос
– 1 лажица сусам опционално
– 1 лажица урда опционално
– Малку сок од лимон
– 1 лажица маслиново масло
– Црн бибер

Начин на припрема

Највкусна па повкусна не знам дали си јадела. Исецкај ја зелката, прсни и сол и изгмечи ја со рака малку да омекне и да поприми од солта. Додај си кромитче, лукче и магдонос доколку сакаш бидејќи токму лукчето е она што ја прави оваа салата посебна. Прсни сок од лимон и маслиново масло, а доколку сакаш може да си додадеш и една лажица урда со потпечено сусамче.

/////

ПОЈАДОК: Душа палачинки

Калории: 442

Состојки
– 4 големи лажици овес
– 2 јајца
– 1 мала банана
– Малку прашок за пециво
– Мед, за врз секоја палачинка
– Кисела вода

Начин на припрема
Смесата треба да испадне полутечна, ни многу густа, ни многу течна. Нешто помеѓу американски и обични палачинки. Киселата вода е задолжителна за овој рецепт (додаваш една, две лажици). Ги блендираш сите состојки, ОСВЕН медот. Ја премачкуваш тавата со малку масло (одлично е доколку имаш кокосово), мора да биде загреано, па потоа ја намалуваш ринглата и истураш од смесата. Истурај внимателно затоа што смесата е потечна и брзо се шири низ тавчето па да може да ја превртиш палачинката и да не ти излезат многу големи. На крај врз секоја палачинка истураш мед. Најубаво е да се јадат додека се топли! На здравје! Можеш да ги јадеш со плус бобинесто овошје по желба!

Калориска вредност
Калории: 442 kcal | Масти: 13g | Протеини: 20g | Јаглехидрати: 61g

УЖИНА: Зелена бомба

Состојки
– 1/4 банана
– 1/4 авокадо
– 1 помало зелено јаболко
– Полна рака спанаќ
– 200 мл растително млеко
– 1 лажиче течен засладувач
За одозгора: 2-3 јаготки и малинки, 1 лажица гранола

Начин на припрема
Изблендирај ги сите состојки, постави ги во длабоко чинивче и декорирај си, па сркај. Или едноставно пиј го како смути, можеш да си додадеш и коцка две мраз да ти стане потечно. Во овој случај, место да ставаш гранола, може да изблендираш 2 лажици овес заедно со сите состојки па изостави ја гранолата. Слободно можеш да си ја поделиш оваа ужина на два дела доколку ти е потребно!

Калориска вредност
Калории: 322kcal | Масти: 16g | Протеини: 15g | Јаглехидрати: 28g

РУЧЕК: Динстано телешко месо со печурки

Калории: 533

Состојки
– 150 гр телешко месо
– 1/2 главица кромид
– 1 морков
– 1 свежа пиперка
– 300 гр печурки
– Магдонос
– 1 ловоров лист, по желба
– 1 интегрално лепче
– 1 порција свежа зелена салата или туршија

Начин на припрема

Зеленчукот се сечка на ситно, може да го пропржиш најпрво кромидот со малку масло пред да го додадеш останатиот зеленчук и месото, а како подобра варијанта додади го телешкото месо исечкано на коцки или кременадли, додади го зеленчукот, истури вода и остави да се вари додека не омекне мевцето, а потоа додади да се потпече, за да биде меко од внатре, а запечено од надвор. Моја предлог идеја, со едно готвење свари поголема количина на телешко мевце, а останатото замрзни го и вади си по потреба со точна грамажа или парче само за тебе, па наместо да вариш секој пат само ќе додадеш зелечук да се запржи, го додаваш одмрзнатото варено мевце да се затопли и имаш готов ручек за многу кратко време.

Калориска вредност
Калории: 533kcal | Масти: 24g | Протеини: 50g | Јаглехидрати: 29g

ВЕГЕ РУЧЕК: Киноа- наут bowl

Калории:460

Состојки
– 3 лажици киноа
– 30 гр наут (сиров или 90 гр од конзерва)
– 1/2 авокадо
– Зелена салата микс или по избор
– За дресинг: 1 лажиче путер од кикирики измешано со малку вода за потечно
– За наут зачини: шарена сол, кари, куркума, бибер, пипер и 1 лажица маслиново масло

Начин на припрема
Киноата стави да се вари, а веќе сварениот наут можеш за повкусно и покрцкаво задоволство да го измешаш со зачини и маслиново масло па да го потпечеш на тавче или во рерна, како ти е побрзо во моментот. Откако ти е готово се, нареди си во чинија и прелиј со путер од кикирики.

Калориска вредност
Калории: 460kcal | Масти: 30g | Протеини: 13g | Јаглехидрати: 35g

ВЕЧЕРА: Веге салата

Калории:285

Состојки
– 30 гр црвен грав (сиров, доколку користиш од тегла/конзерва, околу 90 гр)
– 5-6 цветчиња карфиол
– 1/4 авокадо
– 1 кромид опционално
– 2-3 лажици ориз или булгур
– 1 шака обарен спанаќ
– 1 цвекло (свежо или малку обарено)
– Сок од лимон
– Зачини: сол, бибер, буковец, кари, може и тако

Начин на припрема
Оризот и гравот треба да ги свариш, а карфиолот со малку зачини да го потпечеш. Цвеклото изрендај го, и прсни му солче и сок од лимон, авокадото испасирај го и прсни му солче, бибер и сок од лимон. Нареди си во чинија, сликни и промешај се заедно. Ако ти фали нешто за вкус додај си зачин и маслиново масло 1 лажица.

Калориска вредност
Калории: 285kcal | Масти: 6g | Протеини: 11g | Јаглехидрати: 46g