5. СОЛЕНИ НАМАЗИ И ДОДАТОЦИ

ЗДРАВ МАЈОНЕЗ

Протеини: 41 гр / Хидрати: 7 гр / Масти: 27 гр  Вкупно калории: 431

СОСТОЈКИ:
• 5 тврдо варени јајца
• 100 гр грчки јогурт
• 1 лажица сенф
• 1 лимон, само сокот
• Прстофат сол

Начин на припрема:
Се во блендер, чувај во фрижидер најмногу до 7 дена.

Хумус од леќа и грашок

Протеини: 24гр / Хидрати: 51гр / Масти: 31гр  Вкупно калории: 581

СОСТОЈКИ:

• 1 конзерва зелена леќа , исцедена од вода (или сварете си сами)
• 3 полни шаки грашок сварен
• 1 лимон (сокот)
• 2 мали лажици таан 
• 1 лажица маслиново масло
• 1 рака свежо нане (или зачин)
• сол по вкус

ПРИПРЕМА:

Сите состојки се блендираат, а хумусот го складираш во тегличка. Намазите кои ќе ги најдеш подолу се тука да го заменат класичниот хумус или авокадото. 

Хумус Натурал

Протеини: 17гр / Хидрати: 33гр / Масти: 54гр  Вкупно калории: 683

СОСТОЈКИ:

• 2 чаши варен наут или конзерва (околу 400г)
• 3 лажици таан (околу 45г)
• 3 лажици екстра девствено маслиново масло (околу 30мл)
• 2 чешниња лук
• рамна лажичка сол
• половина лажичка бибер
• сок од 1 лимон

ПРИПРЕМА:

Потопете го наутот во ладна вода (сув наут од продавница за здрава храна) од вечер, за да отстои околу 12 часа минимум. Премијте го и ставете го во тенџете за варење и додајте малку сол. Потоа го варите помалку од еден час. По варењето оставете го да отстои во топлата вода. Отстранете ја водата и наутот е спремен за блендање. Доколку не ви се троши време ни за оваа процедура, се важи и наутот од конзерва. 

Ставете ги сите намирници во блендер и блендирајте околу 5 минути. Доколку е погуста смесата, додавајте малку од водата во која се варел наутот, додека не добиете смеса со густина на пире. Добиената хумус складирајте го во стаклен сад, како теглички и чувајте го во фрижидер. Истиот хумус вака е спремен за сервирање. Сервирајте го со ливчиња магдонос и малку бибер. Намазот може да го јадете: во салати, намачкан на интегрално лепче, на интегрална тортиља, да си исечете стапчиња од краставица и така да го јадете со краставицата – каде и да му најдете примена.

Туна паштета

Протеини: 33гр / Хидрати: 3гр / Масти: 17гр  Вкупно калории: 303

СОСТОЈКИ:

• 1 туна 
• 4 оревчиња 
• 2 маслинки 
• лажиче сенф 
• може копар и малку пармезан (но и не мора)
• лукче

ПРИПРЕМА:

Се надевам дека блендерот кој го имаш дома е доволно силен затоа што сите намази кои се на листава се подготвуваат во него. Паштетата од туна може и да се пасира без да се блендира заедно со сите состојки. Оревчињата се сечкаат на најситно за да им го почувствуваш убаво вкусот. Се складира во тегличка или нешто пластично и се чува во фрижидер. Овој намаз е одличен да се намачка на печено лепче доколку немаш доволно време да спремиш вечера или врз тортиља со малку рукола.

Пилешка паштета

Протеини: 47гр / Хидрати: 6гр / Масти: 6гр  Вкупно калории: 261

СОСТОЈКИ:

• 150 гр пилешко месо 
• 1 морков 
• сол
• бибер
• мелена сол или зачини по избор

ПРИПРЕМА:

За мене ова е највкусното паштетче, а во исто време има најмалку калории од сите останати. Пилешкото се вари заедно со морковот да омекнат убаво, а веднаш потоа се блендираат, се додава сол, бибер, а јас знам често да додадам и мелена сол. Не е погрешно да се додаде било кој друг зачин што го сакаш и ти е вкусен. Одличен намаз за на лепче наутро ако си во брзање или на тортиља. 

Паштета за Шампи(њ)они

Протеини: 14гр / Хидрати: 16гр / Масти: 61гр  Вкупно калории: 664

СОСТОЈКИ:

• 200 гр шампињони 
• 50 гр ореви 
• 2 лажици маслиново масло
• лажиче лимонов сок 
• праз, лук и зачини по желба

ПРИПРЕМА:

Битно е паштетата да биде подготвена од свежи, а не саламурени шампињони. Се сечкаат и се пропржуваат, а потоа сите состојки се додаваат во блендер. Оооодличен и превкусен намаз за наутро, ручек или вечера како замена на хумус или авокадо за сите оние кои сте љубители на печурки.

Баба Гануш

Протеини: 12гр / Хидрати: 42гр / Масти: 17гр  Вкупно калории: 371

СОСТОЈКИ:

• 2 модри патлиџани 
• 1 лажица таан 
• сок од пола лимон 
• сол по вкус

Испечете ги патлиџаните добро , отстранете го месото и изблендајте се заедно.

ПРИПРЕМА:

Ако си љубител на модри патлиџани исто како мене, тогаш овој намаз ќе ти биде О- МИ- ЛЕН! Можеш слободно да го користиш и во салати, гарнир со месо, на лепче и тортиљи. Модрите патлиџани се печат добро, се отстранува лушпата, а потоа се блендира се заедно.

Песто од маслинки

Протеини: 9гр / Хидрати: 26гр / Масти: 62гр  Вкупно калории: 697

СОСТОЈКИ:

• маслинки без семка , околу 200-300 грама
• 1 лажица маслиново масло
• 1 мало лажиче сенф
• зачини по избор
• 30 гр бадеми киснети во вода

ПРИПРЕМА:

Ветено, сторено! Кога ве прашав што сакате во делот направи сам, неколку девојки го предложија намазот од маслинки, па затоа се потрудив да биде на листата. Потребни се околу 200 гр маслинки или за почеток пробај направи пола доза за да видиш дали ти се свиѓа. Начинот на подготовка е едноставен. Се блендираат во блендер па им се додава лажиче маслиново масло, малку сенф и зачини по избор (оригано, магданос, лимон, лук, сушен домат). Исто како и останатите намази, ова песто од маслинки може да го користиш во се.

Песто сос

Протеини: 32гр / Хидрати: 16гр / Масти: 178гр  Вкупно калории: 1794

СОСТОЈКИ:

• чаша свеж босилек, ситно сецкано
• 2/3 од шолјата сецкани ореви (по избор: бадеми или индиски ореви) (100g)
• 3 лажици рендан пармезан (45g)
• чешне лук
• 1 лажичка сок од лимон
• 2/3 шолја маслиново масло (100g)
• прстофат сол

ПРИПРЕМА:

Најпрво ги ставате сецканите ореви/бадеми или индиски ореви во блендер, па додајте ги босилекот и чешнето лук и изблендајте ги на крупни парчиња. Додајте го маслиновото масло и продолжете да блендате, ќе добиете убава, мазна и хомогена смеса. Следно,додадете го пармезанот и повторно кратко блендајте. Следно е зачинувањето на сосот: потребно е да додадете прстофат сол и убаво наросите со црн пипер. Ова е основната доза, а вие во зависност од вашиот вкус, можете да додадете плус сол или пармезан, но внимавајте на состојките да не претерате, сепак треба да е здрав намаз. Сосот е спремен за сервирање и уживање во него. На здравје!

Наш ајвар

Протеини: 7гр / Хидрати: 42гр / Масти: 16гр  Вкупно калории: 336

СОСТОЈКИ:

• 3 големи црвени ајварски пиперки
• 2 големи модри патлиџани
• 1/2 главичка или цела, по вкус, ЛУК
• (ако некој сака луто, може да се додаде и мала лута пиперка)
• 1 лажица маслиново масло
• хималајска сол

ПРИПРЕМА:

Измиј го зеленчукот, и насечкај го на мали парчиња, исчисти го и лукчето. Зеленчукот така исечкан стави го во тава за печење на хартија за печење и печи околу 30-тина минути на 200 степени, или додека зеленчукот не омекне. Откако е готов, стави се во блендер заедно со маслиновото и солта и блендирај, па складирај си во тегличка.

Слатко кисел кромид

Протеини: 1гр / Хидрати: 21гр / Масти: 0гр  Вкупно калории: 90

СОСТОЈКИ:

• кромид, зависи од големината
• 1 лажица кафеав шеќер
• алкохолен оцет 
• ловоров лист
• бибер во зрна
• вода
• 2-3 тркалца живо цвекло за поубава боја, по желба
• 1/2 лажиче сол

ПРИПРЕМА:

Идејата за слатко- киселиот кромид беше од наша членка во Армијата, а сите сме и многу благодарни за тоа! Лесно се подготвува, а уште полесно се комбинира. Идеален е во секоја солена комбинација. Од сендвичи, до салати, на печени лепчиња врз некој намаз. Сигурна сум дека ќе знаеш како да го искористиш. Подготовката е уште полесна.

Кромидот се сече на две половинки, а потоа половинките на полукружни тенки лентички. На страна во тегла се прави маринадата со 1/2 шол оцет, останатиот дел е вода, се додава прстофат сол, една лажица шеќер и се меша. Исечканиот кромид го ставаме да постои две- три минути во веќе зовриена вода, а не го вариме. Од кога ќе омекне го редиме во чиста тегла, не во таа каде што е маринадата, ја полниме теглата до крај, притисни со раката да собере што е можно повеќе кромид. Додади ловоров лист и биберче во зрна. Цвеклото не е задолжително, но ќе даде поинтензивна боја, а не влијае на вкусот. На крај во теглата додади ја маринадата со оцет. Затвори ја теглата и чекај убаво да биде изладено, а потоа се чува во фрижидер.

Домашен леб за Армијата

Протеини: 66гр / Хидрати: 373гр / Масти: 55гр  Вкупно калории: 2246

СУВИ СОСТОЈКИ:

• 250 гр. Интегрално пченично брашно
• 250 гр. Брашно од спелта (меко)
• 1 пециво
• 2 лажички сол (хималајска)

ТЕЧНИ СОСТОЈКИ:

• 1 лажица мед
• 3 лажици маслиново масло
• 300 мл. млака вода

ПРИПРЕМА:

Измешај ги сувите состојки во длабок сад. А потоа кај нив додај:

• 1 лажица мед
• 3 лажици маслиново масло
• 300 мл. млака вода

И замеси тесто, обликувај го во која форма сакаш. Може да му напрскаш семиња, и печи го на хартија за печење. Рерната загреј ја на 250 степени уште штом почнеш да го правиш затоа што е без квасец и не треба да чекаш да стасува. Стави го да се пече на 250 додека не нарасне а потоа намали на 200 степени. Печи вкупно 20-тина минути, но бидејќи сите рерни не се исти, пробувај со нож дали е испечен внатре па по потреба печи и повеќе. Верувај ми, повкусен леб не си пробала.